Pacijentu u venu ubrizgali sredstvo za dezinfekciju

Još uvijek nije potpuno jasno kako je umro 62-godišnji pacijent u bolnici u Čakovcu, no ako je suditi po posljednjim informacijama, radi se o nevjerovatnoj greški, pišu hrvatski mediji.

Region 01.10.2020 | 08:55

Prvo je iz čakovečke bolnice stigla informacija da je čovjeku tokom rutinskog postupka hemodijalize ubrizgana pogrešna supstanca.

Potom je direktor Županijske bolnice Čakovec Tomislav Novinščak za Index rekao kako je “medicinsko sredstvo pacijentu dato intravenozno umjesto lokalno, no nije pojasnio o kakvom se sredstvu radi“.

Ipak, izjava predsjednice Uprave bolnice Čakovec i direktorke Zavoda za zdravstvo Međimurske županije Sonje Tošić Grlač baca novo svjetlo na cijeli slučaj. Ona je naime u Dnevniku Nove TV ipak potvrdila kako je je 62-godišnjem pacijentu greškom ubrizgano dezinfikaciono sredstvo.

Novinar je u uvodu razgovora kazao kako je vjerovatno da je u žili 62-godišnjaka  završila medicinska hemikalija za dezinfekciju.

Upitana kako je moguće da se dogodila ovakva pogreška, Tošić Grlač kaže kako je dezinficijens u bolnicama uobičajeno sredstvo koje se nalazi na kolicima medicinskih sestara.

– Greška je moguća i, nažalost, ona se i dogodila – kaže.

Objašnjava kako će se profesionalno provesti interni nadzor te su danas uzete izjave učesnika.

– Sve će se analizirati, interna komisija će ponovno razgovarati sa svima i donijeti svoje mišljenje, a onda će doći i inspekcija Ministarstva – rekla je Tošić Grlač.

(Index)